Ċirkulari 01/23
Lill-istazzjonijiet tar-radju u t-televiżjoni u lid-djar privati tal-produzzjoni tal-programmi
OPPORTUNITÀ TA’ SUSSIDJU GĦAL KORS ONLINE FIL-KITBA TAL-MALTI
Ċertifikat fil-Qari tal-Provi bil-Malti (Livell 5 - MQF)
Certificate in Proofreading Maltese (MQF 5)
Għal sena oħra, l-Awtorità tax-Xandir qed tisponsorja tliet impjegati li jaħdmu għat-televiżjoni, ir-radju u s-siti elettroniċi tal-aħbarijiet (ġurnalisti, xandara, impjegati li jieħdu ħsieb il-grafika, u produtturi privati) biex jattendu l-kors universitarju li jwassal għaċ-Ċertifikat fil-Qari tal-Provi bil-Malti (MQF 5) u għax-Xhieda ta’ Għarfien (warrant) mill-Kunsill tal-Malti.
Dan il-kors se jibda fit-13 ta’ Frar 2023 u huwa organizzat mid-Dipartiment tal-Malti fl-Università u l-Kunsill Nazzjonali tal-Ilsien Malti. Il-kors huwa ta’ sena fuq bażi part-time, u l-lezzjonijiet tiegħu jsiru online t-Tnejn u l-Ħamis mill-5:30pm sat-8:30pm.
Dawk interessati jridu jgħarrfu lill-Awtorità sa mhux aktar tard mill-Erbgħa 25 ta’ Jannar 2023. Il-ħlas amministrattiv ta’ mal-applikazzjoni, li jsir lill-Università, jitħallas ukoll mill-Awtorità sakemm dan ma jsirx tard (late application). L-Awtorità twaqqaf is-sussidju jekk il-persuna magħżula ma tkomplix il-kors. F’dak il-każ tkun marbuta li tgħarraf minnufih lill-Awtorità bil-ħsieb tagħha li tieqaf.
Il-kors hu maħsub għal min juża l-Malti miktub fil-post tax-xogħol u għal kull min jixtieq itejjeb il-kitba tiegħu bil-Malti. Temmewh diġà b’suċċess għadd ta’ xandara u ġurnalisti, u x-xewqa tagħna, bħala Awtorità, hi li nkomplu nżidu l-impjegati tal-qasam tax-xandir ikkwalifikati fl-ortografija tal-Malti.
Kull min hu interessat japplika għandu jikteb minnufih lill-Kap Eżekuttiv tal-Awtorità tax-Xandir, Dr Joanna Spiteri (joanna.spiteri@ba.org.mt) biex jirreġistra l-interess tiegħu. L-għażla ta’ min jieħu s-sussidju ssir mill-Awtorità tax-Xandir u skont min juri l-interess tiegħu l-ewwel mal-Awtorità. Wara li jsiru magħrufa l-parteċipanti li se jiġu ssussidjati, l-Awtorità tiffirma ftehim magħhom dwar is-sussidju li jkun se jingħatalhom.
Min jintgħażel biex jingħata s-sussidju jrid japplika wkoll għall-kors sal-31 ta’ Jannar 2023 fis-2pm mis-sit tal-Università:
https://esims.um.edu.mt/esims/sits.urd/run/siw_ipp_lgn.login?code1=UCPRMPTE&code2=0015&process=siw_ipp_app
Għal tagħrif ieħor fuq il-kors u għall-għajnuna fuq kif tapplika, idħol hawn: www.um.edu.mt/arts/malti/korsijiet/cqp
Dr Joanna Spiteri
Kap Eżekuttiv
6 ta’ Jannar 2023
Ref: 73/01