Ċirkulari 11/24
Lill-istazzjonijiet tat-televiżjoni u lid-djar privati tal-produzzjoni tal-programmi
OPPORTUNITÀ TA’ SUSSIDJU GĦAL KORS ONLINE FIL-KITBA TAL-MALTI
Ċertifikat fil-Qari tal-Provi bil-Malti (Livell 5 - MQF)
Certificate in Proofreading Maltese (MQF 5)
Għal sena oħra, l-Awtorità tax-Xandir qiegħda tissussidja impjegati li jaħdmu għat-televiżjoni, ir-radju u s-siti elettroniċi tal-aħbarijiet (ġurnalisti, xandara, impjegati li jieħdu ħsieb il-grafika u produtturi privati) biex jattendu l-kors universitarju li jwassal għaċ-Ċertifikat fil-Qari tal-Provi bil-Malti (MQF 5) u għax-Xhieda ta’ Għarfien (warrant) mill-Kunsill tal-Malti.
Għal din is-sena l-Awtorità ser tkun qed tagħti din l-opportunità lill-ewwel persuna biss li tapplika, mill-qasam tat-televiżjoni, minħabba li għall-kors preċedenti kienu interessati aktar minn tliet persuni li s-soltu tissponsorja l-Awtorità. Għalhekk iż-żewġ postijiet l-oħra diġà mtlew awtomatikament mill-persuni li kienu fil-lista ta’ stennija għal dan il-kors.
Dan il-kors part-time, li huwa twil sena (żewġ semestri), se jibda fit-13 ta’ Frar 2025 u huwa organizzat mid-Dipartiment tal-Malti fl-Università u l-Kunsill Nazzjonali tal-Ilsien Malti. Il-lezzjonijiet tiegħu jsiru online t-Tnejn u l-Ħamis mill-5:30pm sat-8:30pm.
Il-kors hu maħsub għal min juża l-Malti miktub fuq il-post tax-xogħol u jixtieq itejjeb il-kitba tiegħu bil-Malti. Numru ta’ xandara u ġurnalisti diġà temmewh b’suċċess fis-snin li għaddew. Dan huwa ta’ sodisfazzjon għall-Awtorità li tixtieq ittejjeb il-kwalità tal-ilsien Malti użat fix-xandir u li hi impenjata biex tkompli żżid in-numru ta’ impjegati li jkunu kkwalifikati fl-ortografija tal-Malti.
Min hu interessat li japplika għandu jgħarraf lill-Awtorità sa mhux aktar tard mis-7 ta’ Jannar, 2025. Il-ħlas amministrattiv mal-applikazzjoni, li jsir lill-Università, jitħallas ukoll mill-Awtorità sakemm dan ma jsirx tard (late application). L-Awtorità twaqqaf is-sussidju jekk il-persuna magħżula ma tkomplix il-kors jew ma tgħaddix mill-eżamijiet tal-ewwel semestru. F’dak il-każ tkun marbuta li tgħarraf minnufih lill-Awtorità bil-ħsieb tagħha li tieqaf.
Kull min hu interessat japplika mistieden jikteb lill-Kap Eżekuttiv tal-Awtorità tax-Xandir, Dr Joanna Spiteri (joanna.spiteri@ba.org.mt), biex juri l-interess tiegħu. L-għażla ta’ min jieħu s-sussidju ssir mill-Awtorità tax-Xandir u skont min jirreġistra l-interess tiegħu l-ewwel mal-Awtorità. Wara li jsir magħruf il-parteċipant/a li se jiġi/tiġi ssussidjat/a, l-Awtorità tiffirma ftehim mal-parteċipanti kollha dwar is-sussidju li jkun se jingħatalhom.
Importanti li min jintgħażel għas-sussidju japplika wkoll uffiċjalment għall-kors mis-sit tal-Università sal-31 ta’ Jannar 2025 fis-2pm:
https://esims.um.edu.mt/esims/sits.urd/run/siw_ipp_lgn.login?process=siw_ipp_app&code2=0017&code1=UCPRMPTE
Għal tagħrif ieħor fuq il-kors u għall-għajnuna fuq kif tapplika, idħol hawn: www.um.edu.mt/arts/malti/korsijiet/cqp
Dr Joanna Spiteri
Kap Eżekuttiv
24 ta’ Diċembru 2024
Ref: 73/01