Ċirkulari 08/25
Lill-istazzjonijiet tar-radju u t-televiżjoni u lid-djar privati tal-produzzjoni tal-programmi
OPPORTUNITÀ TA’ SUSSIDJU GĦAL KORS ONLINE FIL-KITBA TAL-MALTI
Ċertifikat fil-Qari tal-Provi bil-Malti (Livell 5 - MQF)
Certificate in Proofreading Maltese (MQF 5)
Għal sena oħra, l-Awtorità tax-Xandir qiegħda tissussidja impjegati li jaħdmu għar‑radju, it-televiżjoni u s-siti elettroniċi tal-aħbarijiet (ġurnalisti, xandara, impjegati li jieħdu ħsieb il-grafika u produtturi privati) biex jattendu l-kors universitarju li jwassal għaċ-Ċertifikat fil-Qari tal-Provi bil-Malti (MQF 5) u għax-Xhieda ta’ Għarfien (warrant) mill-Kunsill tal-Malti.
L-Awtorità għal din is-sena ser tkun qed tagħti din l-opportunità lill-ewwel żewġ persuni li japplikaw. Is-soltu l-Awtorità tissussidja tliet impjegati iżda għall-kors preċedenti kienu interessati iżjed persuni għalhekk post minnhom diġà mtela awtomatikament mill‑persuna li kienet fil-lista ta’ stennija.
Dan il-kors part-time, li huwa twil sena (żewġ semestri), se jibda fid-9 ta’ Frar 2026 u huwa organizzat mid-Dipartiment tal-Malti fl-Università u l-Kunsill Nazzjonali tal-Ilsien Malti. Il-lezzjonijiet tiegħu jsiru online t-Tnejn u l-Ħamis mill-5:30pm sat-8:30pm.
Il-kors hu maħsub għal min juża l-Malti miktub fuq il-post tax-xogħol u jixtieq itejjeb il‑kitba tiegħu bil-Malti. Numru ta’ xandara u ġurnalisti diġà temmewh b’suċċess fis‑snin li għaddew. Dan huwa ta’ sodisfazzjon għall-Awtorità li tixtieq ittejjeb il-kwalità tal-ilsien Malti użat fix-xandir u li hi impenjata biex tkompli żżid in-numru ta’ impjegati li jkunu kkwalifikati fl-ortografija tal-Malti.
Dawk interessati li japplikaw għandhom jgħarrfu lill-Awtorità sa mhux aktar tard mis-6 ta’ Jannar, 2026. Il-ħlas amministrattiv mal-applikazzjoni, li jsir lill-Università, jitħallas ukoll mill-Awtorità sakemm dan ma jsirx tard (late application). L-Awtorità twaqqaf is‑sussidju jekk il-persuna magħżula ma tkomplix il-kors jew ma tgħaddix mill-eżamijiet tal-ewwel semestru. F’dak il-każ tkun marbuta li tgħarraf minnufih lill-Awtorità bil-ħsieb tagħha li tieqaf.
Kull min hu interessat japplika mistieden jikteb lill-Kap Eżekuttiv tal-Awtorità tax‑Xandir, Dr Joanna Spiteri (joanna.spiteri@ba.org.mt), biex juri l-interess tiegħu. L‑għażla ta’ min jieħu s-sussidju ssir mill-Awtorità tax-Xandir u skont min jirreġistra l‑interess tiegħu l-ewwel mal-Awtorità. Wara li jsiru magħrufa l-parteċipanti li se jiġu ssussidjati, l-Awtorità tiffirma ftehim magħhom dwar is-sussidju li jkun se jingħatalhom.
Importanti li min jintgħażel għas-sussidju japplika wkoll uffiċjalment għall-kors mis-sit tal-Università sat-30 ta’ Jannar 2026 fis-2pm:
IPP login screen
Għal tagħrif ieħor fuq il-kors u għall-għajnuna fuq kif tapplika, idħol hawn:
www.um.edu.mt/arts/malti/korsijiet/cqp
Dr Joanna Spiteri
Kap Eżekuttiv
17 ta’ Diċembru 2025
Ref: 73/01