Stqarrija għall-Istampa
20 ta’ Frar, 2025
PR: 02/25
Sussidju għall-Kors fil-Qari tal-Provi bil-Malti
Kif dejjem għamlet fi snin preċedenti, l-Awtorità tax-Xandir qed terġa’ tissussidja ġurnalisti u produtturi ta’ kontenut tax-xandir għall-kors tal-Qari tal-Provi bil-Malti. Dan isir bil-għan li jitjieb l-użu tal-ilsien Malti fix-xandir partikolarment dak miktub.
Minħabba li l-Kodiċi tal-Ilsien Malti taħt Kapitlu 350 tal-Liġi ta’ Malta jitlob responsabbiltajiet u obbligi fuq l-Awtorità tax-Xandir u fuq ix-xandara, l-Awtorità tagħraf l-importanza li l-impjegati tax-xandir u l-ġurnalisti jkunu mħarrġa sew fit-tħaddim tal-lingwa. Dan jgħin ukoll biex titjieb il-kwalità fix-xandir u fil-programmar. L-Awtorità għalhekk tagħmel ħilitha biex tħajjar aktar nies fis-settur tax-xandir jużaw u jħaddnu Malti tajjeb.
Dan il-kors iwassal għal Ċertifikat Universitarju fil-Qari tal-Provi bil-Malti ta’ Livell 5 (MQF) u huwa organizzat mill-Università ta’ Malta u l-Kunsill tal-Malti. Għal din is-sena l-parteċipanti li ntgħażlu huma Ilona Sciberras minn Newsbook u Ruth Zammit DeBono minn The Maltese Herald. Dawn il-parteċipanti kienu ilhom li wrew interess biex jibdew dan il-kors u din is-sena l-Awtorità tathom din l-opportunità biex itejbu l-ħiliet tagħhom fil-kitba bil-Malti.
Waqt li ġie ffirmat il-ftehim bejn il-parteċipanti u l-Awtorità tax-Xandir, iċ-Chairman tal-Awtorità s-Sur Frank V. Farrugia qal li din hija okkażjoni oħra fejn l-Awtorità tagħti sehemha biex il-livell tal-Malti fix-xandir jitjieb. Qal li s-semmiegħa u t-telespettaturi saru aktar konxji dwar l-użu tal-Malti u qed jitolbu li l-Malti jitħaddem sew fix-xandir.
Fl-istess okkażjoni, il-Kap Eżekuttiv Dr Joanna Spiteri qalet li bis-saħħa ta’ dan il-kors il-ġurnalisti jew ix-xandara li jkunu temmew il-kors b’suċċess ikunu punt ta’ referenza għall-kollegi tagħhom u b’hekk it-tħaddim tal-lingwa fil-kmamar tal-aħbarijiet, fid-djar tal-produzzjoni u fl-istazzjonijiet ikompli jkun aħjar speċjalment f’ċirkostanzi fejn ikun hemm bżonn il-qari tal-provi. Qalet li kull min isegwi x-xandir ikun qed jistenna li l-preżentaturi, ix-xandara, il-produtturi u l-ġurnalisti jagħtu l-eżempju u jħaddmu l-lingwa u l-kitba b’mod tajjeb u aġġornat.
Temmet tgħid li fil-frattemp, apparti dan is-sussidju, fil-jiem li ġejjin l-Awtorità flimkien mal-Kunsill tal-Malti se tkun qed toffri kors qasir imma intensiv dwar l-użu tal-Malti fix-xandir.
Waqt il-preżentazzjoni tal-ftehim li sar bejn l-Awtorità tax-Xandir: [mix-xellug]
Iċ-Chairperson tal-Awtorità tax-Xandir Frank V. Farrugia, Ruth Zammit DeBono minn The Maltese Herald, Ilona Sciberras minn Newsbook u Dr Joanna Spiteri - Kap Eżekuttiv tal-Awtorità tax-Xandir.
.