Reklamar ta’ Xorb Alkoħoliku
Issa li qed joqrob żmien il-festi, jiżdiedu r-reklami marbuta max-xorb alkoħoliku. Infakkarkom li reklamar għal xorb alkoħoliku jista’ jixxandar biss bejn id-9.00p.m. u s-6.00a.m.
Il-Leġislazzjoni Sussidjarja 350.24 telenka l-obbligi li stazzjonijiet iridu jsegwu meta jxandru dawn it-tipi ta’ reklami. Minbarra li dawn ir-reklami jridu jixxandru wara d-9.00p.m, hemm ukoll diversi klawsoli li jispjegaw trattamenti inaċċettabli waqt tali reklamar.
Fost l-aktar importanti nsibu li:
- L-ebda reklam m’għandu jimplika li x-xorb alkoħoliku huwa parti essenzjali mir-rutina ta’ kuljum jew li jista’ jġib bdil fil-burdata.
- Minuri m’għandhomx jintwerew jew jinstemgħu f’reklamar ta’ xorb alkoħoliku.
- Xejn f’reklam m’għandu jippromwovi x-xorb waqt is-sewqan jew waqt li jkun qed jintuża makkinarju.
- M’għandux jintwera alkoħol jiġi kkunsmat f’ambjent ta’ post tax-xogħol.
Importanti wkoll tiftakru li fir-reklami ma jistax ikun hemm referenzi għal happy hour drinks, ixrob kemm trid, ixtri tnejn u tingħata wieħed b’xejn jew offerti simili li jinkoraġġixxu l-konsum eċċessiv jew immoderat tal-alkoħol.
Dawn ir-regolamenti jgħoddu wkoll għall-irkejjen ta’ teleshopping.
Nitlobkom biex tieħdu nota ta’ dawn ir-regolamenti sabiex ma jkunx hemm il-ħtieġa li l-Awtorità tintervjeni sabiex tieħu azzjoni kontra reklamar ta’ xorb alkoħoliku jew reklami ta’ attivitajiet li fihom ikun hemm implikat il-konsum eċċessiv tal-alkoħol.
Pierre Cassar
Kap Eżekuttiv
4 ta’ Diċembru 2015
Ref 186/00